Sjoe, en uiteindelik is al die vakansiedae en langnaweke verby... “Nee, ons grap maar net, ons weet ons mense geniet ‘n rusdaggie of twee om van ‘n langnaweek nie eens te praat nie. Maar ‘n mens kan met vrymoedigheid aanneem dat ons vroue ‘n sug van verligting slaak. Oor die afgelope twee langnaweke is daar ongetwyfeld lekker oor-en-weer gekuier en behalwe nou vir die een of twee keer wat pa ‘n paar stukkies vleis oor die kole gegooi het, moes ma en sus maar telkens inspring om al die honger magies aan die gang te hou. ‘n ‘n Vrou se werk hou mos nooit op nie...
Maar noudat die luilekkerdae voorlopig iets van die verlede is en die huisgesin se roetine vinnig besig is om na normal terug te keer, (die skole begin volgende week) dink ons aan ‘n eenvoudige gereg wat maklik en vinnig is om gereed te kry as jy moeg van die werk af kom of nee wag, vir daardie laaste, enkele vakansiedag Donderdag vandeesweek.
Terwyl vanjaar se mielie-oes tans so belowend op die land staan (veral nadat dit vir maande gedreig het om ‘n “droogte-oes” te wees) is Magdalean Spies van Zeerust se mieliegereg dalk net die ding. Magdalean is die voorsitter van die Platina-streek se Zeerust-tak in die Vrouelandbou-unie. Soos ons lesers onthou was ons die laaste klompie weke besig met ‘n klein reeksie kosmaakartikels na ‘n lekker kuiertjie by VLU-dames daar in die bosveld. Hierdie is ‘n vinnige, maklike gereg wat heerlike vullend en “warm” is en wat gerus in die lig van die komende winter teen die yskasdeur geplak kan word. Magdalean maak dit so:
Bestanddele
2 x 410g blikkies roomsuikermielies
2 ekstra groot eiers
1 teelepel sout
2 teelepels bakpoeier
1 koppie melk
1 koppie vars room
1 koppie koekmeelblom
Metode (onthou - voorverhit jou oond tot 160°C)
Meng al die bestanddele goed saam. Skep in gesmeerde oondvaste bak van ongeveer 20cm x 30cm en bak vir ongeveer 1 uur lank. Die resep behoort meer as genoeg vir 6 tot 8 persone te wees.
