Dit is nou maar eenmaal so: Suid-Afrikaners hou van tuisgebak – nog al die jare! As jy dus in jou resepteboek nie kan spog met ‘n beproefde reseppie van jou grootouma se grootjie wanneer julle die koffie- en teekoppies laat ratel en almal “oe” en “aah” oor dié of daardie spesiale resep vir beskuit, koek, melkkos, kleinkoekies, gemmerkoekies, gemmerbier of dergliks nie, nee, dan bly jy liewers maar stil. Tradisie het dit nou maar eenmaal onder ons mense gevestig. As ‘n ding nie oud is en homself deur letterlik eeue gevestig en bewys het nie, is dit nog lank nie te sê dat dit ‘n wenresep is nie.
Kyk nou maar mooi wat gebeur by ‘n kerkbasaar, of ‘n kultuurfees, of so-iets. Die gebakte poedings, beskuit, souskluitjies, koeksisters, sjokeladekoek en witkoeke, hawermout-koekies, Jan Smuts-koekies en ag, al daardie lekkernye wat oor eeue heen onder Suid-Afrikaners gewild geword het, (om van droë wors en biltong nie eens te praat nie) verdwyn sommer baie vinnig van die tafels af.
‘n Mens sien by sulke geleenthede dikwels mense wat nie alleen vroeg opdaag nie, maar boonop ‘n ekstra skinkbord of twee saambring. Nou weet jy hoekom nê? Die afgelope naweek by Rusoord Tehuis vir Bejaardes se Somersmark, was dit weer so – Kiewiet en Trienie Weitsz het Saterdag gekiedenis gemaak deur nie minders nie as 46 brode te bak en ieder en elk voor huistoegaantyd te verkoop! (Gelukkig het ons met hulle ‘n afspraak gehad anders het ons dalk ook ‘n bloutjie geloop). Vir diegene wat met leë hande huis toe is, kan ons darem die resep aanbied – dis is beslis die moeite werd hoor!
Trienie en Kiewiet se gewone witbroodresep lyk so – die resep is genoeg vir iemand wat darem ‘n klompie broodjies wil bak hoor... Dis is heeltemal genoeg vir so amper ses tot sewe broodjies. Heeltmal voldoende vir jou volgende kerkbasaar, skoolfunksie of as jy nou werklik ‘n taamlik groot party aan’t reel is. Onthou papiersakkies waarin jy jou heerlike warm brode kan plaas – nie plastiek nie – anders “sweet” jou broodjie homself sopnat…
Bestanddele
5 kg koekmeel;
1 koppie semels;
3 eetlepels sout;
2 eetlepels suiker;
4 pakkies kits-suurdeeg;
125g Margarien;
Metode;
Meng die bestanddele goed. Knie deeglik met genoeg louwarm-water om ‘n hanteerbare deeg te vorm. Laat rys vir ongeveer ‘n driekwart uur. Knie vir ‘n tweede keer goed af. Vorm die deeg in broodvormpies en pak in broodpanne. Laat rys tot die pannetjies met deeg mooi hoog staan en bak dan in ‘n voorverhitte oond teen 160°C vir tussen 45 en 55 minute. Dankie Kiewiet en Trienie – die broodjie was al te heerlik!
