Hierdie week kies ons koers Brigadoon toe – net so ‘n hanetreetjie vanaf die bekende Wigwam Aftree-oord. Sonja Dekker en haar gesin het jare gelede al vir hulle hier ‘n pragtige “wegkruipplekkie” aan die voet van die Magaliesberg uitgesoek en dit is waar hulle naweke hulle heil vind. Met ons inloer was daar boonop kuiermense – Sonja se ma (Annetjie de Villiers) van Klerksdorp het kom kuier en die twee dames het sommer saam ingespring om vir ons ‘n bekende, maklike maar baie lekker hoenderpastei en ‘n ewelekker koolslaai te maak. Dit is ‘n heerlike kombinasie – probeer dit gerus!

Vir Rustenburgers wat die afgelope week of wat op taamlik gereelde basis by die Rustenburg skou aangedoen het, was die keuse oor wat om vanmiddag of vanaand te eet nogal uiteenlopend. Met minstens vyf kosstalletjies by die skou was daar vir die meeste ma’s sekerlik iets na die gesin se smaak – al was dit dan sommer net kerrie-en-rys – wat inderwaarheid ‘n uitstekende keuse vir dié tyd van die jaar was!

In die afgelope vier weke se aflewering van Raak die klits kwyt kuier ons in die kombuise van Rustenburgers wat lede van die Internasionale Rotary-beweging is. Rotary International beywer hom vir gemeenskapsprojekte - meestal in sy onmiddellike omgewing - om uit te reik na gemeenskappe waar daar groot behoefte is of aan spesiale projekte wat op fondsinsameling gefokus is sodat hierdie belangrike werk voortgesit kan word. Maar Rotary se mense kan ook al te lekker sosiaal verkeer en kuier - as jy nie ‘n mense-mens is nie, is Rotary waarskynlik nie vir jou nie...

In ons kookrubriek het ons baie onlangs aangekondig dat “Raak die ‘klits’ kwyt” binnekort hoop om af te skop met ‘n reeks artikels oor etnies-tradisionele disse en resepte. Met ander woorde - alles en enigiets van boerepotjie of -bobotie tot Engelse “stew”, Indiese kerries, achthar en “vuurwarm blatjang waarvoor die Indiërs so bekend is,... Dan ook Duitse Bratwurst, Italiaanse pizza of pasta, Griekse slaaie en -eksotiese geregte... Maar ons wil ook by die tafels van ons swart, bruin of “geel” (met apologie) landgenote aansit en sonder enige verwyt, skuldgevoel, agterdog of vooroordeel lepels vol lekker kos in ons bordjies skep en saam met ons gashere wegval aan ‘n koningsmaal - al is dit ook hoe volksvreemd!

Na verlede week se kook is dit tyd om bietjie meer na ons gesondheid te kyk en daarom het Rachel Morwe van die Rustenburg Herald hierdie week vir ons ‘n besonderse lekker aartappelhoendergereg voorberei. Toe ek en my vrou verlede jaar in Moskou in Rusland was het ons gesien dat veral die Russe lief is vir ‘n gebakte aartappel met ‘n vulsel.
‘n Sekere kitskosrestaurant daar hol die aartappel uit, meng die inhoud met kaas (wat dan smelt) en hierdie mengsel word dan terug in die aartappel gesit. Dan voeg hul ‘n verskeidenheid bolae (waarvan jy jou gunsteling kies) bo-op.
Rachel se resep is baie dieselfde en hoort ‘n wenner te wees as ‘n vinnige aandete vir die hele gesin.

Elders in hierdie uitgawe (ja sommer ingesluit by die gewone prys) sal ons lesers ‘n interessante bylaag in die vorm van ‘n spesiale ode aan vroue in die besigheidsmilieu onder oë kry. Ja, as ‘n mens hierdeur blaai kan jy sekerlik nie anders nie as om weer eens tot die besef te kom dat ons mans sonder ons vroue maar taamlik ver en diep verlore sou wees.

Mans wat nog nie daarvan oortuig is dat vroue ‘n “grootse skepping” is nie, moet dalk vir oomblik daaraan dink dat jy jou “onstaan en loshande die grootste gedeelte van jou opvoeding en karakter aan jou moeder te danke het? Dit behoort vir baie van ons stof tot nadenke te wees - iemand het by geleentheid gesê - “liewers geen pa as ‘n slegte pa - en liewers ‘n slegte ma as geen ma….

Sedert daar so 'n paar ligte buie reën hier in ons streek uitgesak het, is dit asof daar smiddae en saans so ietwat van 'n koel luggie deur die lapa trek en 'n mens kan dit darem nou weer waag om effens naby aan 'n vuur te staan. Ja-nee, die afgelope Desember-vakansie se temperature is sekerlik nie iets wat ons maklik sal vergeet nie en ten spyte van 'n vakansiestemming was daar seker lanklaas 'n maand waarin mense so min vure aangesteek het.

Na die kwaai reën van voorverlede week en ‘n paar bitterkoue dae sedertdien spog die meeste spyskaarte met gunstelinge en maklike happies wat die innerlike ‘n bietjie warmer maak en ja, sommer die siel ook verkwik soos die radio elke naweek sê. Foto’s van sneeubedekte berghange op TV en al wat koerant is, is te pragtig maar is nou nie juis iets wat ‘n mens se hart laat warm klop nie nê?

Nee, vir vandeesweek se bietjie warmte sorg Orange Grove Restaurant net ‘n hanetreetjie buite die stad op die Johannesburgpad. Johan en Madeleine Scholtz is die nuwe eienaars van die Orange Grove Restaurant (voorheen van Geelhout Teetuin) waar Johan as sjef die pot aan die kook hou en Sonné Groenwald as restaurantbestuurder optree.
Toe die spyskaart bespreek is, het Johan sterk aangedring op ietsie so ietwat “warms” en ons is uiteindelik met ‘n tradisionele gunsteling verras. Johan se muti teen die winterkoue is niks anders nie as peri-peri hoenderlewertjies met mieliepap – regte winterkos! As jy genoeg vir so 4 tot 5 porsies wil maak, het jy die volgende nodig:

Twee koppe is beter as een lui die spreekword mos en wat is dan nou beter as twee susters of broers wat in die kombuis saamspan om ‘n heerlike maaltyd voor te berei? Maar ‘n mens moet net pasop dat jy nie in ‘n woordestrik beland nie – as jy jou in die Kaap bevind en dalk viskop-sop maak kan jy nog daarmee wegkom – maar o wee, pasop as jy hier in die hartjie van “Transvaal” dieselfde met hoender probeer – mense sal dalk die verkeerde afleiding maak as daar van hoederkop of wat-ook-al gepraat moet word…

Nouja, gelukkig weet Beverley Breytenbach en haar sus Vivian Wienand presies wat om met hoender in die kombuis te doen. Klein Loralee Breytenbach sit ook by en help om vir ons al die bestanddele en speserye aan te gee en te help dat ons genoeg inspirasie het terwyl Beverley en Vivian vir ons heerlike pasta- en roomhoender maak. Die resep lyk so:

Rustenburg’s ice cold/freezing winter nights are probably shouting for something hot/something new/something easy or something delicious to treat your family and to help them forget the awfulness of the winter of 2018. Then again there are those who don’t mind the winter at all but who love a surprise on the dining table.
Here’s how Pieter Germishuys and his team at the Hedgehog’s Nest Culinary Institute prepare pan-grilled chicken breast fillets in an Indian Korma sauce with coriander, toasted almonds and Naan bread. (Korma is a deliciously creamy sauce with desiccated coconut and a delicately balanced blend of authentic spices with ginger, slight chili and coriander).

My ma se hoenderpastei was my hele lewe lank die middelpunt van spesiale geleenthede.
Verjaarsdagvieringe was volmaak met die lieflike geure en die goudbruin kors van daardie pastei. ‘n Kerstafel was nie volledig sonder ma Anna se hoenderpastei nie en Nuwejaar sou beslis minder voorspoedig gewees het indien die pastei nie vir ete op die tafel was nie.
My ma het nooit dié resep neergeskryf nie, gevolglik, na haar dood, moes ek talle probeerslae uitvoer – sommige met meer sukses as ander.
Na deeglike ‘trial and error’ dink ek ek het by ‘n gereg uitgekom wat byna by hare sou kon kers vashou.

Ons reeks met VLU-dames in die Platinastreek van die Vrouelandbou-unie begin so stadig maar seker einde se kant toe staan en ‘n mens wonder of jy ooit daarin sal slaag om al die beste, lekkerste en mees tradisionele Suid-Afrikaanse resepte en disse met ons lesers te deel en hulle sodoende te help om ‘n stukkie van hierdie kultuurskat vir hul kinders te bewaar. Vandeesweek ‘n interessante storie... Marelize Church van Rustenburg is in baie kringe bekend - eiendomme, sakevrou, spyseniering en ja - tot van gholf kan jy haar min vertel. Marelize is die vierde van vyf kinders en het as “hotelkind” op die dorpie Alice in die Oos-Kaap grootgeword. Marelize se ouers het albei die hotelle op dié dorpie besit en die kinders moes van kleins af leer om gereeld maar veral naweke en vakansies ‘n bietjie handjie by te sit. So ja, van kos maak kan jy Marelize ook nie veel vertel nie. Sy het onlangs ‘n lid van die VLU geword.